يا قريـــــــــــــــة
يا قريــــــــــــة مقواه ذا الشعب اتبهدل ****المير اللي جي يخدم عرشو و أماليه
على كل باب بيرو دارو موعرقـــــــــل * *** وعالبادج كاتب لعندو حق يديـــــــه
المعريفــــــــــــــــــــة جاريه تحت الظل **** في السرية التامة كلش تقظيــــــــه
القرار في درج المكتب امعطــــــــــــل ****ماكانش اجوامير لكاشي و اسنيي فيــه
الرشوة و البيسطو و الفساد استفحل ****و المير اللي جي اغمض عينيـــــــــــه
السكنى و السيارة يبيع يشري و ابدل****يتلبد خايف الناس ايفيقو بيـــــــــــــــه
المواطـــن البسيط كره اجرى و افشل****حقو قدامو ضاعلو مابين يديــــــــــــــه
ولــــــــــــــد لبلاد راسو تحت اسفل**** يا خوتي شوفو الظلم بعينيــــــــــــــــــه
الحم الدار ياكلو البراني راعي البل ****ولد القرية خربه ظلمه تكفيــــــــــــــــــــه
مولا الجاه و المال ابجلوه يستهل****و المغبون اظال عند المير احلل فيــــــه
يا قرية رعيان تاكل في جنبك ما اتمل****و المسؤول اللي جي يطوالو كرعيـــــه
يا قرية مقواه شعبك عايش في الذل ****ماالقاش اشكون انش الذبان اعليـــــــه
الشبيبة عاطلة مالقت امنين اطل****و الادارة فاهمة فن التمويــــــــــــــــــــــــه
هاذا حالك يا قرية صيفتك ماتتبدل ****والقانو ن اللي جي الجهال امفيدا فيـــــــه
كايـــــــــــن شيء عباد تستاهل الذل ****حاشا الفقير اللي ماعندو مايكفيــــــــه
ياراس المحنه جاوبني وين راه الحل ****واش قالو كبار القرية قول هيـــــــــــه
اكلابك في الانتخابات اتحشم و اتحلل****اعطيني صوتك تشوف الخير بعينيــــه
في كل ركنه و اتجاه تجري اتهرول****هذا متصدر حزب العدالة زكيـــــــــــــــه
ظرك ناسك بقات غير ادلل*****امعوله على قفة رمضان محسوب عليــــــــــــه
اجرحتي حبيبك و جميع من قال انا افحل****احطوه في القائمة اسمو مغضوب عليه
يا قرية مقواه شعبك اتبهدل****المير اللي يجي يخلق مشكل اسهيــــــــــــــــــه
هم الغاز و التريسيتي مالقينالو حل****زاد هم الريزو ولشان نسى فيـــــــــــــه
مسؤول سونلغاز اعرض في اكتافو يستطول****روحو اشكو للوالي منو زيدوالهيه
اطرق امحفره عمها الطين و لوحل****و الماء مغلاه مر من لكماين نشرو فيــه
كلانــــا الناموس و البورززو زاد جمل****و لي لدغاتو عقرب الموت تديـــــــه
ماني طالب جاه لا هزان زبل****نخمم في ولد ولدي وينا اصبيطار نداويــــــــه
بلغت صوتي معليهش حتى كي نتسلسل ****هذا وقت الذل خلوني نهجيـــــــــه
اتمشريك الفم في لقهاوي يجيهم ساهل****اقلك خلي البير بغطاه اواه لا تاذيـــه
بركانا من جار و مجرور فرمي و اقفل ****ادجيه دوبل سيس في الصلاة تنسيه
يا راس المحنه مهما الزمان يوادعك و اطول****موحال صور الرمل لا اتعليــه
يا قريـــــة لسان حالك لغافل يشمل****العبد الجاهل لعمر خسارة فيــــــــــــــه
يا قريــــــة مقواه ذا الشعب اتبهدل****كل غريب يرجع للحيط اكاليــــــــــــــه
جانا رمضان و شعبان قريب يرحل****لعندو كبش خروف من ريان يجي يديه
اكتب يا تاريخ القرية و زيد سجل ****خليتلك شعري امانه للاجيال ترويـــــــه
تعيشي حره يا قرية و كلــــــي امل****و جه ربيع كل صباح نتامل فيـــــــــــه
تاليف الشاعر { عبد المالك محمودي .ابو رمزي }
زريبة الوادي في 16/07/2011
جميع الحقوق محفوظة للشاعرملاحظة : لرفع كل لبس و تاويل من طرف البعض سامحهم الله و هذا رايهم ان قصيدة يا قرية انهكتني و اتعبتني و هي كما تلاحظون تعالج و تنتقد الواقع المعاش و الوضع السائد خاصة سكان الجزائر العميقة و هي شاملة اي لا تخص بيئة و محيط الشاعر فقط تنبيه : ان مصطلح البراني لا اقصد به اي فئة معينة كما اقصد بكلمة المير كل مسؤول في اي مركز كان و البراني لا اقصد به السكان الخارجين عن المنطقة كلنا جزائريين و لنا حق في هذه البلاد و لكن اقصد به اصحاب الجاه و المال و السلطه الجهال الذين لا يتخذون الاساليب الغير قانونية كالرشوة و ما الى ذلك للوصول الى المبتغى المنشود و في الاخير اشكر الجميع على التفهم و شكرا و لكم حرية الحكم على قصيدتي هذه و شكرا و الى اللقاء و انا في اتظار ردودكم و فقني الله و شكرا امضاء الشاعر :أبو رمزي
